الشوق للبلد بي حالها

[طارق جبريل]

والله يا جماعة الخير العبري خانقاني...
اشتهيت البلد واشتهيت اهلي...
نفسي اتحاوم في السموم ديك في شبا شارع شارع
من البغاديد للقرونة للسواعير للكرسناب للقلعة وبرج ود درقي
نفسي افتح برج الحمام أليل عمي الطيب واشوف الزغاليل وصلن وين
عايز اقوم قبل تشرق في بيت خالتي زينب بت ابو دية رحمها الله واقرض
العيش أليلها السمح داك وأقول للنعام التربال أليلم يجي يقبض معاي طير الجنة
عايز اسويلي نبلي وأباري الدباس والقمري ونجي نشويهو في سعف الجريد
مع مامون مكاوي ومجدي ود فاروق ومزمل ود الرحيمة وعبد العزيز ود عامر الخضر... داير امشي السواعير ألقى حبوبتي فردوس بت الريح بالالي البركاوي في كوريتي ألت الألمنيوم وخاتاها بين الازيار فشان تبرد ووكتين اشبع تردفني وراها في الحمار ونندلى لاااتحت ونسلم علي ود تميم ونغشى جدي محمد عثمان ونقول لي زكريا يجهزلنا السكر وكتين نكون طالعين... وبي تحت حبوبتي تتشاكل مع الدقير وهو قلبه ميت يضحك لامن يقع علي قفاهو... ونلاقي كرسني ود حاج كرسني وامي توصيهو علي الحجز أليلنا من بدري فشان وكتين نكون راجعين لا يضيع علينا الحجز... عايز امشي مع مبروك ود الطيب ونفلع التمر وناكل الصيص ونطلع في المنقايات ألات الكشتنير ألتم وآآآآكل زين لامن جضومي كلهن يصفرن وينشف لامن ما اقدر افتح خشمي..... عايز امشي القيف واعدي للجزيرة واتونس مع احمد ود كرسني واقطعلي طماطمايي وآآكلها وهي مسخني من الشمس...
نفسي في عشرة حريق في نادي شبا ووكتين نجوع نطلع انا واحمد ود فتح بلولة ونشوفلنا فول وجنى جداد...
دحين قولولي اسوي شنو...

[تكنو]

طارق جبريل
مو زول غربه لكن الظروف جابره
مالو إن كان صبر كل الخلوق صابره
والصابـرات روابـح لـو يجـن قـمـاح
هو أصلو متين نساكم يُمة شان يطـره
بيتـنـفـس هـــوا ذكــراكــم الـعـطــره
رهيـف إحسـاس حنيـن قلبـو بالفطـره
نديمـو بقـت دموعـو الديمـه منقـطـره
وأصلو إن مـا قعـد بينكـم ولا بيرتـاح
جاهو العيد كمـان زاد القليـب حسـره
سـاد العبـره حلقـو ونفـسـو منكـسـره
هو لا لمّ القـروش لا حصـل المسـره
بلد ما فيها زول مات من عـدم كسـره


ربنا يصبرك ويديك الفى مرادك يا طارق جبريل
البوست بتاعك لذيذ ..

تكنو

[Random]

طارق جبريل

نشاطرك الاشواق وعبرت كلماتك عن احاسيسنا ودواخلنا خير تعبير وكأنما نطقت بما يجيش فينا ونتمنى لك وللجميع العود الحميد المستطاب للبلد الرؤوم


هـــــداوة الريـــــف
كلمات وتلحين : سيد احمد عبد الحميد
غناء وتحليق الاسـتاذة : حــــنان النيل

أيامـنا الزمــــــــان ياحليلن
شاربات من هــداوة الريف
وارثات الجمـــــال من نيلن
عامرات فى ليــالى الصيف

يا دنيا الرســــول أحمــيهن
يا حظ ليــــهن ابقـــا حليف
ذلل كــل المخــــاطر شيــلن
افرش فل زهـــور وقطيـف

ايام من صــــباى يا حليلن
قاصر مهما اقــول توصيف
يا تاريخ اعيـــد تســــجيلن
ارجـوك مُر مرور كالـطيف

يا طير الغصــــــون غنيلن
جــدد لو معـــــدي عفــيف
بالله يا نســـــايم شــــــيلن
يا سرب الحمــام فى اللـيف

عـــاد لمتين نعـود نمشيلن
نسيب بلد الخــداع والزيف
اقول لى ناس فـلان احكيلن
نتونس نتـــــم الكيــــــــف

اوريهن عـــــذابى اشكيلن
ساهرتا الليــــــــالى وكيف
حنست العيــــون لا يسيلن
انهمرن بحـــور غير قيف
.
.




وسأبحث عن هذه الاغنية

[طارق جبريل]

طارق جبريل
مو زول غربه لكن الظروف جابره
مالو إن كان صبر كل الخلوق صابره
والصابـرات روابـح لـو يجـن قـمـاح
هو أصلو متين نساكم يُمة شان يطـره
بيتـنـفـس هـــوا ذكــراكــم الـعـطــره
رهيـف إحسـاس حنيـن قلبـو بالفطـره
نديمـو بقـت دموعـو الديمـه منقـطـره
وأصلو إن مـا قعـد بينكـم ولا بيرتـاح
جاهو العيد كمـان زاد القليـب حسـره
سـاد العبـره حلقـو ونفـسـو منكـسـره
هو لا لمّ القـروش لا حصـل المسـره
بلد ما فيها زول مات من عـدم كسـره


ربنا يصبرك ويديك الفى مرادك يا طارق جبريل
البوست بتاعك لذيذ ..

تكنو
يا سلام يا تكنو ياخي
وصديق احم ومحمد محمد خير ابدعوا
الله يديهم الصحة

[طارق جبريل]

طارق جبريل

نشاطرك الاشواق وعبرت كلماتك عن احاسيسنا ودواخلنا خير تعبير وكأنما نطقت بما يجيش فينا ونتمنى لك وللجميع العود الحميد المستطاب للبلد الرؤوم


هـــــداوة الريـــــف
كلمات وتلحين : سيد احمد عبد الحميد
غناء وتحليق الاسـتاذة : حــــنان النيل

أيامـنا الزمــــــــان ياحليلن
شاربات من هــداوة الريف
وارثات الجمـــــال من نيلن
عامرات فى ليــالى الصيف

يا دنيا الرســــول أحمــيهن
يا حظ ليــــهن ابقـــا حليف
ذلل كــل المخــــاطر شيــلن
افرش فل زهـــور وقطيـف

ايام من صــــباى يا حليلن
قاصر مهما اقــول توصيف
يا تاريخ اعيـــد تســــجيلن
ارجـوك مُر مرور كالـطيف

يا طير الغصــــــون غنيلن
جــدد لو معـــــدي عفــيف
بالله يا نســـــايم شــــــيلن
يا سرب الحمــام فى اللـيف

عـــاد لمتين نعـود نمشيلن
نسيب بلد الخــداع والزيف
اقول لى ناس فـلان احكيلن
نتونس نتـــــم الكيــــــــف

اوريهن عـــــذابى اشكيلن
ساهرتا الليــــــــالى وكيف
حنست العيــــون لا يسيلن
انهمرن بحـــور غير قيف
.
.





وسأبحث عن هذه الاغنية

ياخي زدتني في الواقووود

[merowe]

الاعزاء الاجلاء : طارق جبريل - تكنو - Random
مع وافر تقديري هاهي الاغنية يا راندوم من سيرفر المنتدى وكونوا كما نروم لكم دوماً
Merowe

http://www.merowe.net/images/hdawet_alriif.wma

رابط الحفظ (http://www.merowe.net/images/hdawet_alriif.wma)
بالزر الايمن
حفظ بإسم

[ود الحرازي]

عزيزي طارق جبريل .... سلامات
وبالفعل تفعل الغربة فعلها في العاشق الولهان المتيم بحب الوطن كبيره وصغيره .... وهذه الصورة التي عكستها للحياة اليومية على سجيتها تنتاب الكثيرين منا .... والكثير يكتمها ولا يستطيع البوح بها ... ولكنك فعلتها فأثرت فينا الشجون ......
وقد أراد صديقي - خالد الجود - عضو المنتدى أن نكمل له هذه الصورة التي تسلك نفس المنحى فقال :
مقاشي فاردي احضانها مشرع في انتظار اولادها يغشوا
الشمس ذي عين تتاوق خايفي انو اولادها ينسوا
خايفي تمشي تغيب عليهم وما يحنو عليها يقسوا
راجي ترجعوا بالسلامة وكل مراكب الراحو يرسو
....
فقلت له : استكمالا للصورة :
والقمر واقف يعاين لي رمالو ولعبو وأنسو
مالها ما عادت ملاني وليه ضجيج ساحاتها يخفو
والشجر ساكن مدنقر وين قماريهو البيهتفو
سابت العش منو طارت هل هي لي أوكارها تهفو؟!
والثمر ناضج متكى راجي لي زولاً يقطفوا
****
والبحر كل مرة يزفر وين مريكباتوا البترسو
يمكن الخزان حماهو وتاني ما عاد من يترسو!؟
وشوفوا ( أبو النعلين )* يعاين لي مدارسو الكان تحفوا
ولي رنين أجراسها صلّت وكل طالب خش صفوا
ولي ميادين كورة كانت فرحى بي أهداف يخشوا
*****
ولي مزارع مويتو سايلة وهمو كيف تنجح مسرتوا
أو هناك تلقاهو شافع جاري مبسوط ساق بقرتوا
يا شباب حلتنا وينكم ولي بعيد ليه ما نظرتوا
يلا عودوا تعالوا ليها لا مفر إن كان فكرتوا


أبو النعلين : جبل مشهور في مقاشي يقع خلف المدارس وذلك لآثار نعلين وجدت عليهو ...

[merowe]

ياخي زدتني في الواقووود

من اجل إشعال المزيد من نيران الواقود
بالله يا مرسال شيل السلام ليهو


/images/mursal.mp3

رابط الحفظ
بالزر الايمن
حفظ بإسم (http://www.merowe.net/images/mursal.mp3)

[زحل]

طارق جبريل ..
تحياتي العبقة والله شوقك ولهفتك شوقتنا للبلد وحلاوتا وطبيعتا الرائعة ولكل الذين ورد ذكرهم التحية والتجلة..ولي بنات ابو دية زينب وعاشة..الرحمةوانشا الله ترجع وتبل شوقك وتحوم من البركل تحت ..تفسخ في الهرود والدفيق لا عند السواعير تحلي بالمدينيي والمشرق

[الجاك عطا المنان]

لك التحية الاخ طارق جبريل والمتداخلين جميعا واسال الله ان يرد
غربتنا جميعا ولكم تحياتي 0