نوال الزغبي وقراصة النبق

[طارق جبريل]

يا جماعة الخير كيفنكم
كنت بشوف في قناة الجزيرة لا بي لا علي
زازتني بتي قالت عايزة تشوف روتانا ونانسي عجرم
قلنا خير كدي خلينا ما نغمض عيونا
وحاتكم جات في الاول نوال الزغبي تتعوج من هني لا هني
علي مروحة الطربيزة
والكلام يطلع من خشمها منخنخ
والشلاليف ألاتها علي قراصة النبق
يمين زي الرابطالا طباقة ألات كسري في شلاليفها
شويتين جابولم حوار مع بوسي
بالله المرة ماها قادري تتكلم ووشها مشدود
متل الواحد لامن يكون لاصق وشو في قزاز العربيي ويخوف في ولدو
برضو قلنا خير
شويتين جات هيفاء وهبي
تسويلا في شيتا ولوليوا زي النسوان وكتين يمطمطن في الحلاوة
انتظرناها لامن كملت وجاويجها
جاتنا بت عجرم
لا بسالا خيطين ملصقاهن في صدرها علي ضهر الكوريق
وبرضها غنتلها غناء مسيخ كدي وكله شخابيط
شويتين طلعتلنا اصالة نصري وانا كنت لي زمن ما شفتها
لقيتها عملتلها عمايل في وشها
والنخرين بقن مصنقعات زي الواحد لامن يكون شاميلو شيتا عفن
قلت لي بتي رجعيني لي قناة الجزيري
وروتانتك دي (موش حا تخلينا نصلي الصبح)

وفجأة يطل علينا جميل عازر:
السيد ولد اباه.. لا ماء لا كهرباء في نواكشوط
بما تفسرون فشل حكومتكم في تدبير الشأن الاجتماعي
....
دة الكلام

[ود الحرازي]

عزيزي طارق جبريل ..... لك ودي
أما ما ذكرت من حال عارضات الأحوال والغنج والدلال باسم الفن فهذا هو المثير للسؤال وهذه القنوات التي تتبارى في عرضهن لتحظى بالتمويل والدعم الذي تجده من خلال المتصلين والمتصلات الذين لا هم لهم إلا اشباع رغباتهم التي لا ترقى لعقل ولا دين ولا همة ولا كبرياء .....
ولأهلنا في موريتانيا نقول :
تموت الأسد في الغابات جوعاً .... ولحم ال (..... ) تأكله الكلاب ،،،،
شكرا على العرض الحافي ده ،،،،
مودتي ،،،

[Random]

تحياتي دكتور طارق

ياخي دي مبالغة عديل اتخيلت المنظر

شويتين جابولم حوار مع بوسي
بالله المرة ماها قادري تتكلم ووشها مشدود
متل الواحد لامن يكون لاصق وشو في قزاز العربيي ويخوف في ولدو

:loll::loll::loll::loll:

دمت رائعاً وبألف خير

[طارق جبريل]

Random كيفنك
يا زول والله جنس نصايب
:D:D

[عاشق البارشا]

قراصة النبق دي شكلها كيف
أول مرة نسمع بها