المساعد الشخصي الرقمي

مشاهدة النسخة كاملة : رساله الي الشعب السوداني

فارس الحوبة
28-08-2009, 01:43 AM
رساله الي الشعب السوداني.doc
السلام عليكم ورحمة الله تعالى وبركاته اخوانى الاعزاء داخل وخارج المنتداى رمضان كريم وكل عام وانتم بجير وربناء يحقق امانى الجميع ويبلقه الفى النية والمراد والتحية خاصة الى اللذين يقومون على هذة الصرح الكبير منتديات مروى نت وهذه مساهمة منى فى باب الشعر يا ريت تنيل رضاء الجميع والتحية موصولة لكل شعراء السودان وخاصة شعراء الولاية الشمالية وادونى رايكم وبيننا التواصل شكرا اخوكم فارس الحوبة
فارس الحوبة
28-08-2009, 01:46 AM
أملي قلبك

أملي قلبك بالوطن … بالصغار
قومة العمال دغش … بالنضار
المزارعية الغبش ..
بالجنود الوين تخش ؟؟
في سبيلك كالنهار
بالمداد الما بيغش ..
بي وتر جاء من الجحيم
أملي قلبك بالنسيم
أملي بالطير الرطن
طالما العالم قديم …
ينكسر ريح … المحن
خلي بالك مستقيم
دغري وإن مال الزمن
راحل الليل البهيم
والبصيرات ما عمن
الظروف الليلي أبن …
روقي لا خوف لا حزن
باكر التقيات تنورق …
وتنملي الضرعات لبن
طيبة يا صمت الحنين …
كلما طقاهو هم
لافي آهة ولا أنين …
لا بيروع ليح ودم
من مرارات السنين …
من عصارات الألم
بيمرق الشوق الدفين …
بي كعنكيل العشم

أحكي ليك يا طيبة حكوة
ذات زمان من ضيق وقسوة
وكل يوم من بارحو أسوأ !!!
والمراحات قاطي قط
فجأة في قلب السما …
غيمة غيمتين ..
غيم ربط
كتمة حتي الطين عِرق
والشجر قرب يبق
إلا يا طيبة الخلق …
من بدل تفرح تنق
الشكايات … و السخط ..
لا السحاب داير يصب
لا الهبوب دارت تهب
نسمة نسمة آ رب نقط
من شمالك من جنوبك
الهبوب يا رب هبوبك
من شروقك من غروبك
من تحت من فوق هبوبك
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خشع .. حول في حول …
ظاهر الحال ماهو مخفي …….
وفالنا فيك ما فيهو قول
يا المبرد والمدفي ..
نسمة يا رب الفصول
نسمة كل راس ساعة تكفي ……
نسيمة واحدة لألف زول
ينطلي الجو بالحمار
فجأة من حر لي غبار؟
الطشاشات الدوار
السبابات النقار
نقة الضيق تنطلق
قلنا فاقت باتت أزحم …
الغبار من كتمة أرحم …
أرحم الحر البيلحم …
لا ده لا ده ولا فرق
طيبة تمي الحكوة قولي
الصبر خلوقو هولي
ده الزمن يقسي ويرق
وتم نشيدك في الحلق
عد فات الريح شرق
من بعد جاب السحاب
من بعد قش التراب …
مشط القش والشجر
رجع للطير للوكر
ها البرق شال البرق ..
الرعد ريحة الدعاش
ابشروا بالخير نقطت
أي والله المطر !!!
فارس الحوبة
28-08-2009, 01:48 AM
النخلة


النخلة في الليل المهول ...
وحيدا في عز الرياح
فارس يدارق في الرماح ...
الجايا من كل إتجاه
رغم الجراح ...شح المي ...
الزاد والسلاح
راكز يصول ...لا أنَّ لا حنى للجباه
لا خان بصيرتو الإنتباه
لا حتى قال ديل المغول ... لا خت آه
على عز قديم ... روح عجول
طول مداميك الصبر ...سدابا طاقات النباح
كل ما نزف من جوفو دم ...
كل ما عزف لحنو الصباح
نجم الميامين الحمش
ينضارى شان تشرق شمس
تدي الحياة... الناس ... الحقول
الدابة ... والطير ... والبمش
لكنو ما بخبر أفول ...
والأرض مخلاية التعب
مصلاية العشق الصعب ...ما بتستباح
زي نخلة ... في الليل المهول
كانت بتختبر الفصول
كانت بتمتحن الرياح ... كل ما تطول
والدنيا خوف ... عابر سبيل
يشوف عنف الرياح في النخلة ...
واللا النخلة في عنف الرياح ...
في ليل مهول
طوالي راح يحلف يقول
النخلة ما بترجى الصباح
والطيب الصابر سنين
راجيها باكر ... حقو راح
لا فك دين ... لا سد جوف
رزقو المعلق في الصبيط ...
مشهادو أصبح بين بين
النخلة ما بترجى الصباح
لكن ضراعا في البلد ....
عارف عروق النخلة وين
خابر صمودا المن متين
وسامع مناتقة الرياح ... ساكت صياح
لكن ضراعا في البلد ....
عارف عروق النخلة وين
ضامن ثبات ساقا الهطيط
وسامع مناتقة الرياح ... ساكت صياح
النخلة ما بتقدر تخون الأرض ...
ما بتقدر تكون غير المراح
لي همبريب يغشى البيوت ... عند الصباح
نص النهار ... عند المغيب ... عز الرياح
النخلة تتجاسر تصون عش الطيور
البينا ...تفرد للجناح ...
ما ليها غير تطرح تمور
تملأ الشواويل ... القفاف
ينتم زين ... ينحل دين
يطلق ضهر زولا بسيط
واقف على حد الكفاف
ومن ركة الرزق المتاح
رزقو المعلق في الصبيط
ينزل كما الطير الخفاف ...يقدل نشيط
يخضر زي شتل الضفاف ...
كل ما النشاف بدأ في الصبيط
والنخلة لو عنف الرياح ... الصاقعة
أهوال الفصول ... آفة الذبول ...
قدرت على ساقا الهطيط ... تقع
آ بتموت .......
تلقاها خشت في الببيوت ... بي كل صراح
تبروقة ...سجاجة طهورة ..
طبق من العرجون ... ضنيب هبابة ..
قفة وكسكسيكة ... حبل متين
فتلوهو في ضل الدليب
نشلوبو من بير للشراب
نسجوبو بنبر وعنقريب
تلقاها خشت في الببيوت ... بي كل صراح
حويبل جريد ... يعرش سقف بيتا جديد
أول دخلتو عريس سعيد
مبسوط يقرقر بإنشراح
أو حتى واقودا تقيدو السمحة ...
في نار بارتياح
لي يوم عزيز... يطلع خبيز
نبيذ الليل صفاح
يطلع ملاح ... بروبو ناساتا ضيوف
ولي زول وراهو شغل بعيد ...
جابرا الظروف
يطلع قهيوتو وشاي صباح ...
وآخر المطاف
الموت بيلفح بسمة من توب الزفاف
الموت بشرق نسمة في كل الصبا
النخلة ترباية العباد ...
بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة ...
شوف كيفن بتتحدى الرياح
تصبر على مر الحياة ....
وتنمطق الموت بي جلد
من بعد ما ملت البلد ..شتلا معمر بالألوف
وشايل مخلف بارتياح
طول المصير ... النخلة حوتة الصحرا..
نوارة الجروف
تلقاها في أجمل وشاح
بي جراحا رجتنا الصباح ...
يا القلتو ما بترجى الصباح
النخلة تحت الأرض سر ...
والنخلة فوق نخلة نصاح
والدنيا أوسع ما تكون ... والجو براح
وكل الرياح فوقا بتمر ...
يكفيها دا ... ويكفيها صاح
ما استسلمت لي ريح غريب
وكل الرياح فوق بتمر ...
والنخلة ما بتعرف خلاف ريح اللقاح
والهمبريب ريح الصلاح
يا معوض الليل بالصباح
يا معود النار اللهب ...
روض نخلنا على الرياح
وفي لجة البحر الغريب ...
أدي الرواويس الصلاح
يكفيها دا ... يكفيها صاح
merowe
29-08-2009, 07:55 PM
مشكور كتير فارس الحوبة والمنتدى اصبح بنكهة وطعم مروي الجميلة والله لا يحرمنا منكم ومن مشاركاتكم

:clap::clap:
http://img329.imageshack.us/img329/135/f80bf90eb6ko1.gif
فارس الحوبة
30-08-2009, 04:59 AM
اشكر فيكم اهتمامكم واحى تواضعكم وبشاشت وجوهكم النيرة فانا معكم وبكم اكون
مشكور جدا
ود نوري
07-09-2009, 08:59 PM
مشكور جدا يا فارس الحوبة ودمت ذخرا لنا و للمنتدي
تقبل مروري
merowe
15-09-2009, 09:56 AM
يفتقدك المنتدى كثيراً يا فارس الحوبة
http://www.merowe.net/images/meroweuser/together.jpg

معاً يد بيد لمزيد من الترابط